與酒友談觀鳥（三）

「我上個星期出咗海睇雀呀！睇燕鷗!  ...
... 但係唔係好睇到... 隻船熄咗ENGINE... 跟住啲浪... 圍住個燕島行咗幾個圈...
... 有望遠鏡都睇唔到呀!」

「原來香港有燕鷗呀?  但係咁樣出海, 我唔係好得... 妳竟然出埋海睇雀呀?  妳都好大癮喎!」

***
癮嘛... 可能不止"大"，是"好大"，大得我可以早起床，改變了我的習慣，至少間中幾天的習慣！

與酒友談觀鳥（二）

有天下午，我巧遇間中在酒局碰上的好友，她問：「我見妳FACEBOOK POST咁多雀仔相，妳真係好鍾意... 係咩令妳咁鍾意呢?」

我回應：「我都唔知喎。」

她說：「呀！可能妳以前有一世係雀！」

「哈哈。都可能係！」

＊＊＊
晚上，我與好友閒話家常，告訴他以上的對話。他說：「有一世係雀呀？咁可能你對上一世，同葡萄有仇，今世想剪晒佢哋，榨晒汁，做酒，飲晒佢！」

＊＊＊
我身邊的好友，創意無限。

與酒友談觀鳥（一）

自從近日經常於FACEBOOK張貼雀鳥相片，幾乎每遇上酒界好友，他們都會問：

「點呀？又睇雀嚟呀？」

「睇到咩雀呀？」

「做咩無端端去睇雀呀？」

「你真係好鍾意雀呀？」

另外，個別好友間中傳來W-apps訊息，包括相片或錄音，繼而問：「咩雀呀？」

這天，巧遇好友，則出現以下對話：

「點呀？今日睇到咩雀呀？」

「我真係有新發現喎！EXCHANGE SQUARE一期同二期嗰度，上咗電梯，有個大空間，原來嗰度有幾棵樹，我噚日已經聽到雀聲，但係揾佢唔到... ... 今日見到喇！

但係，我諗，唔知佢有冇嘢食呢？」

「咁嗰度有餐廳吖嘛！」

@.@ 

聽罷，我笑了。

若我明天再遇上雀兒，我要問一問：「雀呀雀，餐廳啲嘢，啱唔啱食呀？」

（待續）

飽食無憂米的學酒之人

於酒局巧遇好友。

第一位甫見我，就問：「妳啱啱曬完太陽，定係飲完酒？」今時今日，作為全職OL，前者沒甚可能，後者的機會率則近九成半。

第二位好友，問：「次次見妳都係飲酒，都冇見妳食嘢，妳係咪有酒飲就得，飯都唔駛食？」我只笑了一下，然後舉起酒杯，說：「Cheers!」

第三位好友說：「早排妳去上個course，有entry exam，點呀？有RESULT未呀？」（下刪百多字）身旁的另一位好友說：「我睇妳都係飽食無憂米嗰啲，如果唔係，點會諗住讀呢個PROGRAM呀？」

＊＊＊

「飽食無憂米」

＊＊＊

我看這句話內裡的含意，跟「生活無憂」沒兩樣，尤其是對於一眾為生活奔波著的香港人來說，不少人在想著各式各樣的生活問題，那五個字別具意味。

自問並非好友想像中的那類「飽食無憂米」之人，然而，回想自己過去的酒學路上，確實為了要品試不同的葡萄品種、產區與年份的酒，有名的，不知名的，好年份的，不好年份的......加上每人總有弱點，要是我對某些味道的靈敏度較低，就要多灑金錢，試罷再試......結果，不容否認的是學酒之人確實要花上好些金錢才能有所成。

那邊廂，早於幾年前，某好友問我會否報讀那個PROGRAM，大家談及要完成課程，成功畢業，要花多少？我們還笑著說，要是誰中了六合彩頭獎，就拿這筆橫財出來一起讀吧！玩笑開完了，我認真的說：「其實，唔係錢既問題，時間同精神係更重要既問題。」當時，我想即使不用我付出一分一毫的金錢，連酒錢也不用出，我會有毅力走上那條酒學之路嗎？

也許，對於攻讀那PROGRAM的CANDIDATE，「飽食無憂米」是有利條件，卻並不是先決與唯一條件。

那個PROGRAM叫MW。

後記：最近愛上觀鳥，有時還會走到鳥兒比較喜歡出沒的地方，靜看牠們的生活，其中一個地方是米行附近，那兒特別多麻雀在飛，沒人走過的時候，牠們就會到地上開餐，我想「飽食無憂米」的，其實是米行的麻雀。